Karlalið Selfoss tryggði sér í dag sæti í 1. deild karla í knattspyrnu með sigri á KFG í lokaumferð 2. deildarinnar á Selfossvelli.
Selfoss hafði góð tök á leiknum í fyrri hálfleik og Brynjar Bergsson kom þeim yfir með góðu marki á 13. mínútu. Brynjar tvöfaldaði svo forskotið með skallamarki á 32. mínútu og 1. deildarsætið blasti við Selfyssingum á þessum tímapunkti.
Vendipunktur varð hins vegar í leiknum á 42. mínútu þegar Filip Sabatti, markvörður Selfoss, fékk að líta rauða spjaldið fyrir klaufalegt brot fyrir utan vítateiginn. KFG fékk um leið aukaspyrnu og skoraði úr henni, 2-1 í hálfleik.
Selfyssingum dugði eitt stig til þess að tryggja sér 2. sætið en um leið varð KFG að sigra til þess að halda sæti sínu í deildinni. Það var því útlit fyrir spennandi seinni hálfleik en Selfyssingar léku skynsamlega úr stöðunni manni færri, vörðust vel og varamarkmaðurinn Rökkvi Rafn Agnesarson átti mjög góðan leik. Hvorugu liðinu tókst að skora í seinni hálfleiknum þannig að Selfyssingar fögnuðu góðum sigri á meðan Garðbæingar lágu í grasinu, fallnir niður í 3. deild.