Selfoss tók á móti Haukum í fjórða leik liðanna í umspili um sæti í úrvalsdeild karla í Vallaskóla í kvöld. Haukar gátu með sigri tryggt sér sigur í einvíginu en Selfyssingar voru ekki á þeim buxunum og sigruðu örugglega 84-75. Liðin mætast því í oddaleik næstkomandi mánudagskvöld.
Selfoss byrjaði betur og leiddi eftir 1. leikhluta, 22-14 en Haukar svöruðu fyrir sig í 2. leikhluta og staðan var 43-40 í hálfleik.
Selfyssingar stóðu af sér öll áhlaup Hauka í 3. leikhluta og voru komnir í nokkuð þægilega stöðu þegar fjórði leikhluti hófst, 64-54. Haukar minnkuðu muninn í þrjú stig í upphafi 4. leikhluta en eftir það voru Selfyssingar með góð tök á leiknum og unnu að lokum sanngjarnan sigur.
Kristijan Vladovic var besti maður vallarins, hann skoraði 33 stig og tók 5 fráköst.
Selfoss-Haukar 84-75 (22-14, 21-26, 21-14, 20-21)
Tölfræði Selfoss: Kristijan Vladovic 33/5 fráköst, Collin Anthony Pryor 17/10 fráköst, Steven Lyles 13/7 fráköst, Óðinn Freyr Árnason 7/7 fráköst, Tristan Máni Morthens 7/6 fráköst, Ari Hrannar Bjarmason 3, Halldór Halldórsson 2, Gísli Steinn Hjaltason 2.