Selfoss tók fjórða sætið með sigri á Gróttu

Vilius Rasimas átti frábæran leik fyrir Selfoss í kvöld. sunnlenska.is/Guðmundur Karl

Selfyssingar enduðu í 4. sæti Olísdeildar karla í handbolta og mæta Stjörnunni í 8-liða úrslitum.

Þetta varð ekki ljóst fyrr en eftir æsispennandi lokaumferð sem öll var leikin í kvöld. Mjótt var á mununum fyrir leiki kvöldsins en með 23-27 sigri á Gróttu á útivelli lyftu Selfyssingar sér upp í 4. sætið.

Leikurinn gegn Gróttu var í járnum framan af og staðan 13-13 í hálfleik. Selfyssingar voru sterkari í seinni hálfleik, þar sem þeir spiluðu fína vörn og áttu góðar sóknir. Munurinn jókst hægt og bítandi og á lokakaflanum náðu ríkjandi Íslandsmeistararnir að slíta sig endanlega frá heimamönnum.

Atli Ævar Ingólfsson skoraði 6 mörk fyrir Selfoss í kvöld og Hergeir Grímsson 6/2. Ragnar Jóhannsson, Alexander Egan og Einar Sverrisson skoruðu 4, Nökkvi Dan Elliðason 2 og Gunnar Flosi Grétarsson 1. Vilius Rasimas lék vel í marki Selfoss, varði 18/1 skot og var með 45% markvörslu.

Selfyssinga bíður áhugaverð viðureign gegn lærisveinum Patreks Jóhannessonar í Stjörnunni. Einvígið hefst í Garðabænum á mánudag eða þriðjudag. Leiknir verða tveir leikir og mun samanlögð markatala úr þeim ráða úrslitum.

Fyrri greinHamar í úrslitaeinvígið
Næsta greinGul viðvörun: Suðaustan hvassviðri