Síðdegis í dag barst boð frá Handknattleikssambandi Íslands til Ungmennafélags Selfoss, þar sem meistaraflokki kvenna var boðið sæti í Olísdeild kvenna.
Víkingur dró lið sitt úr Olísdeildinni og því bauðst Selfyssingum sætið en þær vínrauðu féllu úr Olísdeildinni í vor. Eftir samráð við leikmannahópinn og þjálfara hefur handknattleiksdeild Selfoss ákveðið að taka sætið.
Það er „spennandi vetur framundan hjá liðinu og hvetjum við stuðningsmenn og samstarfsaðila til að flykkja sér að baki liðinu,“ segir í tilkynningu frá Selfyssingum.
Víkingur mun leika í Grill 66 deild kvenna á komandi tímabili. Samkvæmt heimildum sunnlenska.is var var strax í vor rætt um að Víkingar myndu ekki leika í Olísdeildinni en ákvörðunin lá fyrir núna, rúmri viku fyrir Íslandsmótið.
Keppni í Olísdeildinni hefst laugardaginn 5. september en kynningarfundur Olís- og Grill 66 deildanna fer fram á morgun klukkan 12:15 og verður hann í beinni á YouTube rás HSÍ.