Selfoss vann öruggan sigur þegar KA/Þór kom í heimsókn í Set-höllina í dag í úrvalsdeild kvenna í handbolta. Lokatölur urðu 26-22.
Jafnt var á flestum tölum framan af fyrri hálfleik en um miðbik hans skoraði Selfoss þrjú mörk í röð og breytti stöðunni í 9-6. Munurinn varð mestur fimm mörk í kjölfarið og staðan var 15-10 í hálfleik.
Selfoss gerði út um leikinn með frábærri byrjun í seinni hálfleik þar sem þær náðu tíu marka forskoti. KA/Þór nálgaðist á lokakaflanum en sigur Selfoss var aldrei í hættu.
Hulda Hrönn Bragadóttir var markahæst Selfyssinga með 7 mörk, Perla Ruth Albertsdóttir skoraði 6, Eva Lind Tyrfingsdóttir 5, Hulda Dís Þrastardóttir 3/3, Harpa Valey Gylfadóttir 2 og þær Sylvía Bjarnadóttir, Emelía Ósk Aðalsteinsdóttir og markvörðurinn Selma Þóra Jóhannsdóttir skoruðu allar 1 mark.
Selma Þóra átti stórleik í markinu, varði 16/1 skot og var með 42% markvörslu.
Selfoss er í 6. sæti deildarinnar með 7 stig en KA/Þór er í 8. sæti með 4 stig.