Selfyssingar heimsóttu Dalvík/Reyni í 2. deild karla í knattspyrnu á Dalvíkurvöll í dag. Niðurstaðan varð 2-2 jafntefli.
Dalvíkingar komust yfir á 16. mínútu en á 34. mínútu fengu Selfyssingar vítaspyrnu og úr henni jafnaði Viðar Örn Kjartansson metin. Tíu mínútum síðar var Aron Lucas Vokes á ferðinni og hann kom Selfyssingum í 1-2 með sínu þriðja marki í sumar.
Selfoss hafði góð tök á leiknum lengst af seinni hálfleik en fóru illa að ráði sínu í lokin. Dalvík/Reynir fékk vítaspyrnu á 79. mínútu og úr henni kom jöfnunarmarkið. Leikurinn var opinn á lokakaflanum en mörkin urðu ekki fleiri og liðin skiptu með sér stigunum.
Selfoss er með 5 stig eftir 4 leiki, situr í 8. sæti deildarinnar en Dalvík/Reynir er í 9. sætinu með 4 stig.