Selfoss skiptir um erlenda leikmenn

Selfoss hefur sagt upp samningi Michael Rodriguez. sunnlenska.is/Guðmundur Karl

Körfuknattleikslið Selfoss samdi við tvo nýja erlenda leikmenn rétt fyrir áramótin og eru þeir þegar komnir til landsins og með leikheimild.

Jafnframt var samningum við Michael Rodriguez og Arminas Kelmelis sagt upp.

Nýju leikmennirnir eru Chaed Brandon Wellian og Marvin Smith Jr.

Wellian er ríflega tveggja metra hár Hollendingur, 26 ára gamall framherji sem leikið hefur víða um Evrópu. Hann lék 3 leiki með Sindra í 1. deildinni í nóvember og desember og var með 20 stig og 10 fráköst að meðaltali í þeim leikjum.

Smith Jr. er 23 ára gamall Bandaríkjamaður sem lauk ferli sínum hjá University of North Carolina síðastliðið vor. Hann spilaði í haust í NBA G-League með Chicago. Smith Jr. er tæpra tveggja metra leikmaður, léttur framherji sem getur spilað fleiri stöður.

Þeir félagar fá fyrst að spreyta sig í Selfosstreyjunni á morgun, föstudag, þegar Selfoss mætir Snæfelli í Stykkishólmi.