Selfoss vann frábæran sigur í fyrsta leik einvígisins gegn Haukum í átta liða umspilinu í 1. deild karla í körfubolta. Liðin mættust á Ásvöllum í kvöld þar sem Selfoss sigraði 78-81.
Haukar höfðu frumkvæðið í fyrri hálfleik og staðan var 43-37 í hálfleik. Selfyssingar mættu í miklu stuði inn í seinni hálfleikinn og voru komnir yfir, 49-50, eftir rúmar þrjár mínútur. Eftir það voru Selfyssingar skrefinu á undan en munurinn var aldrei mikill.
Það var svo boðið upp á háspennu á lokamínútunum en Haukar komust yfir, 78-77, þegar 39 sekúndur voru eftir af leiknum. Selfyssingar skoruðu hins vegar síðustu fjögur stig leiksins og tryggðu sér sætan sigur.
Collin Pryor var besti maður vallarins, hann skoraði 24 stig og tók 12 fráköst.
Næsti leikur liðanna fer fram á Selfossi á þriðjudagskvöld en það lið sem fyrr vinnur þrjá leiki er komið í fjögurra liða úrslit.
Haukar-Selfoss 78-81 (21-17, 22-20, 21-27, 14-17)
Tölfræði Selfoss: Collin Pryor 24/12 fráköst, Steven Lyles 15/5 fráköst, Halldór Halldórsson 13, Kristijan Vladovic 10/8 fráköst/9 stoðsendingar, Ari Hrannar Bjarmason 9, Tristan Máni Morthens 6/6 fráköst, Birkir Máni Sigurðarson 4.