Selfoss heimsótti ÍR í 1. deild kvenna í körfubolta í kvöld. Úr varð hörkuleikur og úrslitin réðust í framlengingu, þar sem Selfoss hafði betur, 64-68.
ÍR-ingar voru sterkari í fyrri hálfleiknum og staðan í leikhléi var 36-26. Selfoss minnkaði muninn jafnt og þétt í seinni hálfleiknum en það var ekki fyrr en rúm mínúta var eftir að þær jöfnuðu 55-55.
Jessica Tomasetti skoraði síðustu sjö stig Selfoss í venjulegum leiktíma og hún jafnaði 58-58 úr vítaskoti þegar ein sekúnda var eftir af leiknum og tryggði Selfyssingum framlengingu.
Það var allt í járnum í framlengingunni en Selfoss skoraði síðustu fjögur stigin og tryggði sér sigurinn.
Selfoss er í 4. sæti deildarinnar með 22 stig en ÍR í 5. sætinu með 16 stig.
ÍR-Selfoss 64-68 (21-14, 15-12, 8-12, 14-20, 6-10)
Tölfræði Selfoss: Jessica Tomasetti 40/16 fráköst/6 stoðsendingar, Valdís Una Guðmannsdóttir 12/5 fráköst/3 varin skot, Mathilde Boje Sorensen 10, Perla María Karlsdóttir 5, Vilborg Óttarsdóttir 1, Heiður Hallgrímsdóttir 12 fráköst, Gígja Marín Þorsteinsdóttir 4 fráköst, Anna Katrín Víðisdóttir 4 fráköst.