Selfoss heimsótti topplið Gróttu í 1. deild kvenna í knattspyrnu á Seltjarnarnesið í dag. Gróttukonur reyndust sterkari og sigruðu 3-0.
Grótta komst yfir á 20. mínútu með eina marki fyrri hálfleiks og staðan var 1-0 í leikhléi.
Þegar korter var liðið af seinni hálfleiknum urðu Selfyssingar fyrir því óláni að skora sjálfsmark og Grótta innsiglaði svo 3-0 sigur með marki fjórum mínútum fyrir leikslok.
Selfoss er í 5. sæti deildarinnar með 26 stig, þremur stigum á eftir KR sem er í 2. sætinu. Grótta er í efsta sæti og hefur tryggt sér deildarmeistaratitilinn í 1. deildinni þegar tvær umferðir eru eftir.