Selfoss heimsótti Þór Akureyri í gær í 1. deild kvenna í körfubolta. Þórsarar stungu af um miðbik leiksins og sigruðu að lokum 107-79.
Það var skarð fyrir skildi hjá Selfyssingum að vera án Kennedi Watkins, sem tók út leikbann eftir að hafa látið hnefana tala í síðasta leik. Þórsarar náðu fljótlega tökum á leiknum og staðan í hálfleik var 48-35. Norðankonur stungu svo af í 3. leikhluta og undir lok hans var staðan orðin 82-48. Selfoss klóraði lítillega í bakkann á lokakaflanum en sigur Þórsara var öruggur.
Mariana Duran bar uppi leik Selfyssinga með 27 stig, 12 stoðsendingar og 8 fráköst.
Þórsarar lyftu sér upp fyrir Selfoss með sigrinum, Þór Ak er í 2. sæti með 12 stig en Selfoss í 3. sæti með 10 stig en Selfoss á leik til góða.
Þór Ak.-Selfoss 107-79 (19-16, 29-19, 35-18, 24-26)
Tölfræði Selfoss: Mariana Duran 27/8 fráköst/12 stoðsendingar, Valdís Una Guðmannsdóttir 17, Anna Katrín Víðisdóttir 14, Heiður Hallgrímsdóttir 8/9 fráköst, Sigríður Svanhvít Magnúsdóttir 7/5 fráköst, Perla María Karlsdóttir 3, Sigríður Elva Jónsdóttir 2, Eva Run Dagsdottir 1/5 fráköst.

