Selfoss og Þór Þ unnu sína leiki í 1. deild karla í körfubolta í kvöld á meðan Hamarsmenn töpuðu á útivelli.
Selfyssingar voru frábærir gegn Breiðabliki í kvöld og unnu virkilega sterkan sigur. Staðan í hálfleik var 52-44 en þegar Blikar þjörmuðu að Selfyssingum í seinni hálfleik sýndu heimamenn styrk sinn og lönduðu 99-90 sigri. Fjölnir Morthens átti stórleik fyrir Selfoss, skoraði 33 stig og sendi 12 stoðsendingar.
Þórsarar fengu mikla mótspyrnu frá Snæfelli þegar liðin mættust í Stykkishólmi. Staðan í hálfleik var 43-53. Snæfell jafnaði 72-72 undir lok 3. leikhluta og komst yfir í kjölfarið. En þá vöknuðu Þórsarar, þeir kláruðu leikinn af krafti og sigruðu að lokum 93-102. Djordje Dzeletovic stigahæstur Þórsara með 26 stig og 11 fráköst en Þór fékk gott framlag úr mörgum áttum.
Afleitur fyrri hálfleikur gerði út um sigurvonir Hamars gegn Skallagrím. Varnarleikur Hamars var ekki til útflutnings í fyrri hálfleik og staðan var 63-32 í hálfleik. Hvergerðingar náðu að rétta sinn hlut á lokakaflanum en áttu aldrei möguleika á sigri. Lokatölur urðu 105-83. Joshua Hardiman var stigahæstur Hvergerðinga með 19 stig og 8 fráköst.
Staðan í deildinni er þannig að Þórsarar eru í 3. sæti með 12 stig, Selfoss er í 4. sæti með 8 stig og Hamar er í 8. sæti með 4 stig.
Selfoss-Breiðablik 99-90 (22-15, 30-29, 23-26, 24-20)
Tölfræði Selfoss: Fjölnir Morthens 33/4 fráköst/12 stoðsendingar, Aristote Bissokot 20/7 fráköst/3 varin skot, Tristan Máni Morthens 16/4 fráköst, Halldór Benjamín Halldórsson 12/9 fráköst, Avery Cordell Sullivan 10/13 fráköst, Óðinn Freyr Árnason 3, Benjamín Rökkvi Sigvaldason 3, Gísli Steinn Hjaltason 2.
Snæfell-Þór Þ. 93-102 (32-29, 11-24, 31-19, 19-30)
Tölfræði Þórs: Djordje Dzeletovic 26/11 fráköst, Sigvaldi Eggertsson 20/6 fráköst, Skarphéðinn Árni Þorbergsson 17, Halldór Garðar Hermannsson 14/7 fráköst/11 stoðsendingar, Jovan Sljivancanin 13/10 fráköst/7 stoðsendingar, Emil Karel Einarsson 10, Ísak Júlíus Perdue 2.
Skallagrímur-Hamar 105-83 (31-16, 32-16, 28-27, 14-24)
Tölfræði Hamars: Joshua Hardiman 19/8 fráköst, Birkir Máni Daðason 17/7 fráköst, Jose Medina Aldana 17/5 fráköst/8 stoðsendingar, Egill Þór Friðriksson 16, Nicolas Germaan M. Dierynck 6, Lúkas Aron Stefánsson 4, Arnar Dagur Daðason 3, Kristófer Kató Kristófersson 1.