Knattspyrnudeild Selfoss og Jón Daði Böðvarsson hafa komist að samkomulagi um að rifta samningi sín á milli.
Jón Daði gekk til liðs við uppeldisfélagið í júlí í fyrra. Hann hefur verið að glíma við meiðsli í sumar og ekki spilað með liðinu síðan 11. júlí síðastliðinn.
„Frá komu Jóns Daða til Selfoss hafa aðilar lagt sig fram af heilindum og metnaði í þágu félagsins. Eftir yfirferð á stöðu mála og með hagsmuni beggja aðila að leiðarljósi hafa félagið og leikmaðurinn komist að gagnkvæmu samkomulagi um að ljúka samstarfi sínu. Riftun samningsins er gerð í fullri sátt og með gagnkvæmri virðingu að leiðarljósi,“ segir í tilkynningu sem knattspyrnudeildin sendi frá sér síðdegis í dag.
„Ég hafði mikinn áhuga á því að hjálpa til við að byggja upp starfið á Selfossi. Allt á sinn tíma, og taldi ég þetta rétt í stöðunni. Þrátt fyrir að leiðir skilji núna mun ég alltaf líta hlýjum augum til fólksins í Selfoss og óska félaginu alls hins besta í framtíðinni,” segir Jón Daði í tilkynningunni.
Guðjón Bjarni Hálfdánarson, formaður knattspyrnudeildar Selfoss, þakkar Jóni tímann á Selfossi.
„Frá fyrsta degi var markmiðið að Jón Daði myndi hjálpa til við að byggja upp félagið á komandi árum. Jón Daði hefur sýnt mikinn metnað á meðan krafta hans naut við. Jón Daði skilur eftir sig dýrmæta þekkingu hjá félaginu og munum við halda áfram á okkar vegferð að byggja upp öflugt félag í íslenskri knattspyrnu,” segir Guðjón í tilkynningu Selfyssinga þar sem Jóni er þakkað fyrir sín störf og óskað farsældar í þeim verkefnum sem hann tekur sér fyrir hendur.