Það verður væntanlega mögnuð stemning á Laugardalsvelli í kvöld þegar Selfoss og Haukar mætast í úrslitaleik neðrideildabikarsins í knattspyrnu. Flautað verður til leiks klukkan 19 á þjóðarleikvanginum.
Selfyssingar tryggðu sér sæti í úrslitaleiknum með öruggum 5-0 sigri á Álftanesi í undanúrslitum. Þetta er í annað sinn sem Selfoss leikur til úrslita í keppninni og getur liðið orðið það fyrsta til að vinna bikarinn í tvígang. Haukar eru hins vegar að leika til úrslita í fyrsta sinn.
Liðin hafa átt gott tímabil í 2. deildinni og voru þar í efstu tveimur sætunum. Haukar fögnuðu deildarmeistaratitlinum en Selfoss endaði í öðru sæti.
Leikurinn átti upphaflega að fara fram á sunnudag en félögin óskuðu eftir því að honum yrði flýtt og samþykkti KSÍ þá beiðni. Því verður nú leikið í kvöld, föstudagskvöld, undir flóðljósunum á Laugardalsvelli.
Búist er við fjölmenni úr báðum bæjarfélögum. Stuðningsfólk Selfoss ætlar að hita vel upp fyrir leikinn á Risinu í miðbæ Selfoss þar sem húsið opnar klukkan 16. Þar verður meðal annars lifandi tónlist þegar Magnús Kjartan mætir með gítarinn, auk þess sem boðið verður upp á góð tilboð á mat og drykk. Börn og aðrir sem vilja geta fengið Selfoss-litina málaða á sig og einnig verður hægt að versla Selfoss-varning.