Selfoss vann bráðnauðsynlegan sigur á Haukum í 1. deild kvenna í knattspyrnu á Selfossvelli í kvöld. Lokatölur urðu 2-0.
Fyrri hálfleikur var markalaus þar sem liðunum gekk illa að skapa sér opin færi. Staðan var því 0-0 í leikhléi en það breyttist á upphafsmínútum seinni hálfleiks þegar Védís Ösp Einarsdóttir skoraði beint úr hornspyrnu. Um miðjan seinni hálfleikinn tókst Ásdísi Erlu Helgadóttur svo að koma boltanum í netið eftir klafs í teignum og harða hríð Selfyssinga að marki Hauka.
Með sigrinum lyftu Selfyssingar sér upp í 4. sæti deildarinnar með 19 stig en Haukar eru í 6. sæti með 18 stig.