Selfoss vann gríðarlega mikilvægan sigur gegn Stjörnunni í uppgjöri botnliðanna í úrvalsdeild kvenna í handbolta í dag. Lokatölur í Set-höllinni urðu 35-33.
Stjarnan byrjaði betur í leiknum og komst í 1-4 en Selfoss jafnaði 9-9 þegar rúmar tuttugu mínútur voru liðnar af leiknum. Selfoss tók öll völd í framhaldinu og staðan var orðin 17-13 þegar flautað var til hálfleiks.
Selfoss stjórnaði leiknum af miklu öryggi í seinni hálfleiknum og leiddi lengst af með 4-5 marka mun. Stjarnan náði að minnka muninn í tvö mörk á lokamínútunni en sigur Selfyssinga var ekki í hættu.
Marte Syverud var markahæst Selfyssinga með 9/6 mörk, Hulda Dís Þrastardóttir skoraði 7/1, Eva Lind Tyrfingsdóttir 5, Hulda Hrönn Bragadóttir og Emelía Ósk Aðalsteinsdóttir 4 og þær Adela Eyrún Jóhannsdóttir og Arna Kristín Einarsdóttir skoruðu báðar 2 mörk.
Sara Xiao Reykdal varði 8/1 skot í marki Selfoss og var með 31% markvörslu og Selma Þóra Jóhannsdóttir varði 6/1 skot og var með 29% markvörslu.
Þegar tvær umferðir eru eftir af deildarkeppninni er Selfoss í 7. sæti með 6 stig en Stjarnan vermir botninn, er í 8. sætinu með 5 stig.