Selfoss vann öruggan sigur á ÍR í 2. deild kvenna í knattspyrnu í dag, 3-1 á Selfossvelli.
Gestirnir úr Breiðholtinu voru fyrri til að skora í dag, þær komust yfir á 15. mínútu og héldu forystunni fram að leikhléi.
Selfyssingar voru fljótir að svara fyrir sig í seinni hálfleiknum. Guðmunda Brynja Óladóttir jafnaði metin á 48. mínútu og Eva Lind Elíasdóttir kom þeim yfir sex mínútum síðar. Þannig stóðu leikar allt þar til í uppbótartímanum að Embla Dís Gunnarsdóttir kom boltanum í netið og tryggði Selfossi 3-1 sigur.
Selfoss er í toppsæti deildarinnar með 6 stig en ÍR er í 8. sætinu án stiga.