Selfoss vann mikilvægan sigur á Völsungi á Húsavík í 1. deild kvenna í knattspyrnu í dag. Frábær endurkoma í seinni hálfleik tryggði þeim 2-3 sigur.
Völsungur komst yfir á 18. mínútu og þær tvöfölduðu svo forskot sitt í uppbótartíma fyrri hálfleiks. Staðan var 2-0 í hálfleik.
Selfoss byrjaði seinni hálfleikinn af krafti og á 54. mínútu minnkaði Ásdís Erla Helgadóttir muninn í 2-1. Tíu mínútum síðar var komið að Védísi Ösp Einarsdóttur, hún jafnaði 2-2 á 63. mínútu og fimm mínútum seinna var Ásdís Erla aftur mætt fyrir framan mark Völsungs og skoraði hún sigurmarkið.
Selfoss er í 4. sæti deildarinnar með 22 stig, einu stigi á eftir KR sem er í 2. sætinu. Völsungur er í 9. sæti með 12 stig.