Handknattleiksdeild Selfoss hefur kært framkvæmd leiks ungmennaliðs Stjörnunnar og Selfoss í Grill66 deild kvenna sem fram fór í Garðabæ í gær.
Leiknum lauk með 29-29 jafntefli en þegar dómarar leiksins fóru yfir leikskýrsluna að leik loknum bættu þeir við marki á Stjörnuna-U og skráðu úrslit leiksins 30-29, Stjörnunni í vil. Samkvæmt heimildum sunnlenska.is láðist ritaraborðinu að skrá sautjánda mark Stjörnunnar-U á skyrsluna.
Í yfirlýsingu frá Selfyssingum segir að ljóst sé að framkvæmd leiksins hafi verið verulega ábótavant, þar sem handvömm varð á ritaraborði og skráning marka ekki rétt.
„Hafði þetta mikil áhrif á framgang leiksins, en leikurinn varð mjög jafn undir lokin. Sambærilegt atvik gerðist fyrr á þessu ári í Mýrinni, þar sem Stjarnan og KA/Þór mættust í Olísdeild kvenna. Niðurstaða áfrýjunardómstóls HSÍ var að endurtaka þann leik vegna ágalla í framkvæmd leiks,“ segir í yfirlýsingu Selfyssinga.