Selfoss tók á móti HK í 1. deild kvenna í knattspyrnu í bongóblíðu á Selfossvelli í dag.
HK eygði ennþá von um 2. sætið í deildinni fyrir leikinn og Selfoss á reyndar enn tölfræðilegan möguleika á því. Gestirnir úr Kópavogi þurftu nauðsynlega á sigri að halda í dag en Selfyssingar voru mun sprækari og JJ Paoletti kom þeim yfir á 12. mínútu.
Védís Ösp Einarsdótti bætti svo við marki beint úr hornspyrnu á 31. mínútu og staðan var 2-0 í hálfleik.
Í seinni hálfleiknum náðu HK-ingar að minnka muninn í 2-1 á 64. mínútu en Selfossliðið kvittaði fljótlega fyrir það og Sara Rún Auðunsdóttir kom þeim í 3-1 á 73. mínútu.
Fyrir lokaumferðina er Selfoss í 4. sæti deildarinnar með 29 stig, þremur stigum á eftir KR sem er í 2. sætinu. Þar á milli sitja Haukar með 30 stig.