Kvennalið Selfoss er fallið niður í 1. deild eftir stórt tap gegn ÍR í lokaumferð úrvalsdeildarinnar í dag, 33-20. Á sama tíma gerði Stjarnan jafntefli við Hauka og bjargaði sér þannig frá falli.
Eftir jafnar upphafsmínútur í Breiðholtinu í dag náði ÍR þriggja marka forskoti en staðan var 11-7 þegar fimmtán mínútur voru liðnar af leiknum. Þá settu ÍR-ingar í fluggír og munurinn var tíu mörk í hálfleik, 21-11.
Það varð ljóst snemma í seinni hálfleik að Selfoss átti enga von á endurkomu, ÍR náði fljótlega fjórtán marka forskoti og á sama tíma fylgdust Selfyssingar uggandi með stöðunni í leik Stjörnunnar og Hauka. Þar náði Stjarnan að jafna 26-26 þegar fjórar sekúndur voru eftir af leiknum og Selfoss var því fallið.
Marte Syverud var markahæst Selfyssinga með 4/1 mörk, Adela Eyrún Jóhannsdóttir skoraði 3, Hulda Dís Þrastardóttir 2/1, Katla Björg Ómarsdóttir, Inga Dís Axelsdóttir, Eva Lind Tyrfingsdóttir, Sylvía Bjarnadóttir og Hulda Hrönn Bragadóttir skoruðu allar 2 mörk og Perla Ruth Albertsdóttir 1.
Selma Þóra Jóhannsdóttir varði 5 skot í marki Selfoss og var með 19% markvörslu og Sara Xiao Reykdal varði 3 skot og var með 23% markvörslu.