Selfyssingar tryggðu sér í kvöld neðrideildabikar karla í knattspyrnu í annað skiptið á þremur árum eftir frábæran úrslitaleik gegn Haukum á þjóðarleikvanginum í Laugardal í kvöld.
Leikurinn var hin besta skemmtun en Haukar byrjuðu betur og komust yfir á 20. mínútu þegar Ívan Breki Sigurðsson varð fyrir því óláni að renna knettinum í eigið net. Selfyssingar svöruðu því frábærlega að lenda undir, brýndu sig í sókninni og Eysteinn Ernir Sverrisson jafnaði með glæsilegu marki á 26. mínútu.
Staðan var 1-1 í hálfleik og seinni hálfleikurinn byrjaði líkt og sá fyrri með góðum sóknum Haukanna. Þeir virtust líklegri til þess að bæta við marki allt þar til á 72. mínútu að Frosti Brynjólfsson henti ískaldri tusku í andlitið á þeim og skoraði úr skyndisókn Selfyssinga.
Selfoss varðist skipulega í kjölfarið og fábreyttur sóknarleikur Haukanna skapaði ekki mikla hættu en varnarmenn Selfoss voru í yfirvinnu við að skalla knöttinn frá marki. Haukar hentu öllum fram í sóknina á lokamínútunum en skildu útihurðina eftir galopna og það nýttu Selfyssingar sér í uppbótartímanum. Elías Heiðarsson átti þá góðan sprett upp völlinn gegn fámennri vörn Hauka og hann renndi boltanum á Viðar Örn Kjartansson sem skoraði af fádæma öryggi.
Selfyssingar fögnuðu vel í leikslok, studdir af um 600 stuðningsmönnum sem létu vel í sér heyra í stúkunni.
