Kvennalið Selfoss tapaði 0-3 þegar Íslandsmeistarar Vals komu í heimsókn á Jáverk-völlinn í Bestu deildinni í knattspyrnu í dag.
Valur gerði út um leikinn með tveimur mörkum með þriggja mínútna millibili um miðjan fyrri hálfleikinn.
Staðan var 0-2 í leikhléi og þó að leikur Selfoss hafi skánað í seinni hálfleik voru færin af skornum skammti. Valur skoraði þriðja markið úr vítaspyrnu þegar korter var liðið af seinni hálfleik og þar með var öll von Selfyssinga úti.
Valur er í 2. sæti deildarinnar með 26 stig, eins og topplið Breiðabliks en Selfoss er á botninum með 7 stig.