Selfyssingar björguðu sæti sínu í úrvalsdeild karla í handbolta með því að gera jafntefli við Aftureldingu í Set-höllinni í kvöld í æsispennandi leik, 27-27.
Það voru miklar sviptingar í leikjum kvöldsins og tvísýnt hvort Selfoss eða Stjarnan færu í umspil um sæti í úrvalsdeildinni. Fram tryggði sér sigur gegn Stjörnunni í blálokin, þannig að Stjarnan fer í umspilið en ÍR-ingar féllu eftir tap gegn FH.
Afturelding náði fljótlega góðum tökum á leiknum á Selfossi í kvöld og komst í 3-8. Staðan í hálfleik var 7-13.
Það var allt annað að sjá til Selfyssinga í seinni hálfleiknum og eftir fimmtán mínútur voru þeir búnir að jafna, 20-20. Selfyssingar létu kné fylgja kviði, náðu þriggja marka forskoti en Afturelding sló þá frá sér aftur og gestirnir skoruðu síðustu tvö mörkin í leiknum og tryggðu sér jafntefli. Bæði lið fengu tækifæri til að stela sigrinum á lokamínútunni en brást bogalistin.
Selfyssingar halda því sæti sínu í úrvalsdeildinni, þeir enduðu í 10. sæti með 13 stig, en eru komnir í sumarfrí þar sem nú tekur við úrslitakeppni efstu átta liðanna.
Hannes Höskuldsson var markahæstur Selfyssinga með 7 mörk, Hákon Garri Gestsson skoraði 5/2, Tryggvi Sigurberg Traustason 5, Jónas Karl Gunnlaugsson 4, Jason Dagur Þórisson 2 og þeir Elvar Elí Hallgrímsson, Valdimar Örn Ingvarsson og Guðjón Baldur Ómarsson skoruðu allir 1 mark.
Alexander Hrafnkelsson varði 11/3 skot í marki Selfoss og var með 30% markvörslu.