Selfoss áfram í bikarnum

Perla Ruth Albertsdóttir. sunnlenska.is/Guðmundur Karl

Selfoss er komið í 8-liða úrslit í bikarkeppni kvenna í handbolta eftir stórsigur á Víkingi í 1. umferð keppninnar í kvöld. Lokatölur í Virkinu í Safamýrinni urðu 25-43.

Jafnræði var með liðunum fyrstu tíu mínúturnar en þá stungu Selfyssingar af og voru komnar með fimm marka forystu um miðjan fyrri hálfleikinn. Staðan í hálfleik var 10-21.

Selfoss náði sextán marka forystu á fyrstu sjö mínútum seinni hálfleiks og þar með var ljóst að Víkingar áttu engan möguleika á endurkomu.

Perla Ruth Albertsdóttir var markahæst Selfyssinga með 9 mörk, Eva Lind Tyrfingsdóttir skoraði 8, Bára Ingibjörg Leifsdóttir, Harpa Valey Gylfadóttir og Sylvía Bjarnadóttir 5, Eva Sól Axelsdóttir og Hulda Hrönn Bragadóttir 4 og Emelía Ósk Aðalsteinsdóttir 3.

Selma Þóra Jóhannsdóttir varði 11 skot í marki Selfoss og Katla Björg Ómarsdóttir 1.

Átta liða úrslitin fara fram í byrjun febrúar.

Fyrri greinIcebreakers frá Hornafirði sigruðu í Stóru Lego-keppninni