Selfyssingar eru komnir áfram í 2. umferð bikarkeppni karla í knattspyrnu eftir öruggan sigur á Knattspyrnufélagi Ásvalla í 1. umferðinni í kvöld.
Liðin mættust í Haukahöllinni í Hafnarfirði og þar kom Guðmundur Stefánsson Selfyssingum yfir á 35. mínútu. Elvar Orri Sigurbjörnsson skoraði annað mark Selfoss tveimur mínútum síðar og staðan var 0-2 í hálfleik.
Seinni hálfleikur var ekki nema þrettán mínútna gamall þegar Viðar Örn Kjartansson skoraði þriðja mark Selfoss og þar við sat, lokatölur 0-3.
Í 2. umferð munu Selfyssingar mæta sigurliðinu úr viðureign Uppsveita og Augnabliks sem áttu að mætast á Selfossvelli í kvöld. Vegna heitavatnsskorts var Selfossvöllur hins vegar þakinn snjó og því óleikfær.