Kvennalið Selfoss er komið í 2. umferð bikarkeppninnar í knattspyrnu en lið Knattspyrnufélags Rangæinga er úr leik.
Selfoss tók á móti Augnabliki á Selfossvelli í dag og höfðu heimakonur mikla yfirburði. Stevie Reynolds skoraði tvívegis í fyrri hálfleik auk þess sem JJ Paoletti, Embla Dís Gunnarsdóttir og Védís Ösp Einarsdóttir bættu við mörkum, svo að staðan var 5-0 í hálfleik. Hildur Eva Bragadóttir skoraði í upphafi seinni hálfleiks og Reynolds innsiglaði þrennuna á 61. mínútu. Augnablik klóraði í bakkann á 78. mínútu og þar við sat, öruggur 7-1 sigur Selfoss.
Það var meiri spenna í leik KÞ og KFR á Þróttarvellinum í dag. KÞ komst í 2-0 í fyrri hálfleik en Fanndís Lilja Lárusdóttir minnkaði muninn á 42. mínútu og staðan var 2-1 í hálfleik. KÞ komst í 3-1 í upphafi seinni hálfleiks en Kristín Sóldís Ólafsdóttir var fljót að minnka muninn fyrir KFR. Staðan var 3-2 allt fram á lokamínúturnar að KÞ skoraði tvívegis með stuttu millibili og tryggði sér 5-2 sigur.
Selfoss mætir Haukum í 2. umferðinni á heimavelli næstkomandi sunnudag. Liðið sem sigrar þar er komið í 16-liða úrslit keppninnar.