Selfoss mun mæta Haukum í úrslitum neðrideildabikars karla í knattspyrnu um næstu helgi á Laugardalsvellinum. Selfoss sigraði 4. deildarlið Álftaness auðveldlega í dag í undanúrslitum keppninnar á meðan Haukar lögðu Kormák/Hvöt í vítaspyrnukeppni.
Leikur Selfoss og Álftaness varð aldrei spennandi. Álftnesingar hafa verið á mikilli siglingu í sumar, sigruðu 4. deildina með yfirburðum og hafa lagt tvö 2. deildarlið að velli fram að þessu í bikarnum.
Guðmundur Stefánsson kom Selfyssingum yfir strax á 9. mínútu með góðu skallamarki en á 26. mínútu varð vendipunktur í leiknum þegar varnarmaður Álftaness fékk að líta rauða spjaldið eftir að hafa brotið á Elíasi Heiðarssyni í öftustu víglínu. Manni fleiri var eftirleikurinn auðveldur fyrir Selfyssinga, þó að Álftanes hafi haldið sjó fram að hálfleik.
Selfyssingar mættu miklu ákveðnari inn í seinni hálfleikinn og Guðmundur tvöfaldaði forskotið á 52. mínútu, aftur með skallamarki, nú eftir hornspyrnu. Viðar Örn Kjartansson skoraði glæsilegt aukaspyrnumark á 68. mínútu og tveimur mínútum síðar skoraði Aron Fannar Birgisson, 15 sekúndum eftir að hann kom inná sem varamaður.
Síðustu tuttugu mínúturnar áttu Selfyssingar fjölda efnilegra sókna en þeim voru mislagðir fætur á síðasta þriðjungi vallarins. Það var ekki fyrr en á 90. mínútu að Gestur Helgi Snorrason vann boltann og tók á mikinn sprett upp að vítateig Álftaness og lagði boltann glæsilega í netið.
Selfoss sigraði því 5-0 og mætir Haukum í úrslitaleik keppninnar á Laugardalsvellinum, líklega næstkomandi föstudag. Haukar fóru alla leið í bráðabana í vítaspyrnukeppni gegn Kormáki/Hvöt á Blönduósi í dag og sigruðu að lokum 5-6.