Selfoss 2 tók á móti Val 2 í 1. deild karla í handbolta í dag. Frábær endasprettur tryggði Selfyssingunum ungu öruggan sigur, 38-29.
Leikurinn var jafn fyrstu ellefu mínúturnar en þá skoruðu Selfyssingar þrjú mörk í röð og breyttu stöðunni í 10-7. Staðan var 16-14 í hálfleik.
Valsmenn héldu í við Selfyssinga fyrsta korterið í seinni hálfleik en þá stungu þeir vínrauðu af, náðu mest ellefu marka forskoti og unnu öruggan sigur að lokum.
Ragnar Hilmarsson var markahæstur Selfyssinga með 10 mörk, Dagur Rafn Gíslason skoraði 8, Skarphéðinn Steinn Sveinsson 6, Bjarni Valur Bjarnason og Kári Einarsson 4, Dagbjartur Máni Björnsson 3, Guðjón Óli Ósvaldsson 2 og Eyþór Ingi Ingvarsson 1.
Garðar Freyr Bergsson varði 9 skot í marki Selfoss og Egill Eyvindur Þorsteinsson 5.
Selfoss 2 er í 4. sæti deildarinnar með 8 stig en Valur 2 í 9. sæti með 3 stig.