Selfoss 2 vann öruggan sigur á Hvíta riddararnum í 1. deild karla í handbolta í kvöld. Liðin mættust að Varmá í Mosfellsbæ og lokatölur leiksins urðu 27-32.
Selfoss skoraði fyrstu fjögur mörkin og náði fljótlega átta marka forskoti, 2-10. Munurinn varð mestur tíu mörk í fyrri hálfleik en Hvíti riddarinn minnkaði muninn undir lok fyrri hálfleiks og staðan var 11-18 í leikhléi.
Selfoss byrjaði seinni hálfleikinn af krafti og jók forskotið í ellefu mörk. Sigur Selfyssinga var því aldrei í hættu en riddararnir hvítu söxuðu vel á forskotið á síðustu fimm mínútunum en að lokum skildu fimm mörk liðin að. Skák og mát!
Dagur Rafn Gíslason fór á kostum í leiknum og var markahæstur Selfyssinga með 11 mörk, Kári Einarsson skoraði 5, Aron Leo Guðmundsson og Skarphéðinn Steinn Sveinsson 4, Þorleifur Tryggvi Ólafsson 3, Bartosz Galeski 2 og þeir Daði Fannar Jónsson, Dagbjartur Máni Björnsson og Einar Bragi Ágústsson skoruðu allir 1 mark.
Garðar Freyr Bergsson varði 14 skot í marki Selfoss og Egill Eyvindur Þorsteinsson 2.
Selfoss 2 er í 4. sæti deildarinnar með 6 stig en Hvíti riddarinn er í 11. sæti með 2 stig.