Selfoss 2 hóf keppni í 1. deild karla í handbolta í dag með góðum sigri á HK2 á útivelli í Kórnum í Kópavogi. Lokatölur urðu 29-30.
Jafnt var á flestum tölum fyrstu tíu mínúturnar en þá skoraði Selfoss þrjú mörk í röð og breytti stöðunni í 6-9. HK2 jafnaði 11-11 en þá kom frábær sprettur hjá Selfyssingum og staðan var 14-19 í hálfleik.
Byrjunin hjá Selfyssingum var afleit í seinni hálfleik, HK2 jafnaði 20-20, og þá loksins tóku Selfyssingar við sér og juku forskotið aftur í fjögur mörk. Spenna hljóp í leikinn á lokakaflanum þegar HK2 náði að minnka muninn í eitt mark en Selfoss var skrefinu á undan og sigraði að lokum með eins marks mun.
Aron Leo Guðmundsson var markahæstur Selfyssinga með 8 mörk, Ragnar Hilmarsson og Skarphéðinn Steinn Sveinsson skoruðu 5, Haukur Páll Hallgrímsson og Jónas Karl Gunnlaugsson skoruðu 3, Bjarni Valur Bjarnason og Þorleifur Tryggvi Ólafsson 2 og Kári Einarsson 1. Ísak Kristinn Jónsson varði 11 skot í marki Selfoss.