Selfoss vann frábæran sigur á Haukum í úrvalsdeild karla í handbolta í kvöld. Þetta var annar sigur liðsins í vetur en lokatölur í Set-höllinni urðu 30-28.
Selfyssingar höfðu frumkvæðið fyrsta korterið en í framhaldinu tóku Haukar öll völd á vellinum og breyttu stöðunni úr 8-7 í 12-17 og þannig stóðu leikar í hálfleik.
Hafnfirðingar hafa eflaust talið björninn unninn því þeir mættu værukærir inn í seinni hálfleikinn og Selfoss jafnaði 21-21 eftir tólf mínútna leik. Eftir það var leikurinn í járnum og jafnt á öllum tölum fram á síðustu stundu.
Selfossliðið var hins vegar sterkara á lokakaflanum og skoraði tvö síðustu mörk leiksins á milli þess sem Alexander Hrafnkelsson átti risavörslur í markinu.
Hannes Höskuldsson var markahæstur Selfyssinga með 8 mörk, Einar Sverrisson skoraði 6/2, Sölvi Svavarsson 5, Álvaro Mallols 3 og þeir Sverrir Pálsson, Gunnar Kári Bragason, Sæþór Atlason og Tryggvi Sigurberg Traustason skoruðu allir 2 mörk. Sverrir var firnasterkur í vörninni að auki með 7 löglegar stöðvanir, 2 stolna bolta og 1 varið skot.
Alexander varði 10 skot í marki Selfoss og var með 48% markvörslu og Vilius Rasimas varði 6/1 skot og var með 27% markvörslu.
Þrátt fyrir sigurinn eru Selfyssingar ennþá í botnsæti deildarinnar, nú með 4 stig, en frammistaðan í kvöld ætti að gefa liðinu byr undir báða vængi í næstu leikjum.