Knattspyrnudeild Selfoss fékk rúmlega 6,3 milljónir króna úr HM framlagi Knattspyrnusambands Íslands til aðildarfélaga sinna en KSÍ greiddi 200 milljónir króna til aðildarfélaga sinna vegna Heimsmeistaramótsins í Rússlandi í sumar.
Í samræmi við samþykkt ársþings KSÍ byggir ákvörðun um framlag til aðildarfélaga fyrst og fremst á stöðu meistaraflokks karla og kvenna í deildum síðastliðin tvö ár, 2017 og 2018. Félögum er skipt upp í tvo flokka. Annars vegar félög í deildarkeppni, sem eru með unglingastarf og hins vegar félög sem ekki standa fyrir barna- og unglingastarfi.
Selfoss og 46 önnur félög með unglingastarf, fá liðlega 198,5 milljónir króna sem skiptast eftir við stöðu í deildum á áðurnefndu tímabili.
Knattspyrnufélagið Ægir fékk rúmlega 1,6 milljónir króna, KFR og Hamar rúmlega 818 þúsund krónur og Knattspyrnufélag Árborgar 56 þúsund krónur.
Fjármunum sem veitt er til aðildarfélaga skal eingöngu varið til knattspyrnutengdra verkefna félaganna.