Rosemarie sæmd æðstu viðurkenningu íþróttahreyfingarinnar

Félagar af sambandssvæði HSK sem voru heiðraðir á LH þinginu. (F.v.) Helga Ragna, Helga Fjóla, Elísabet, Sigurður, Rosemarie, Halldór, Bjarni, Anna Björg og Margeir. Ljósmynd/HSK

Á Landsþingi Landssambands hestamannafélaga sem fram fór í Hveragerði í lok október voru Rosemarie Brynhildur Þorleifsdóttir, Hestamannafélaginu Jökli og Sigurður Sæmundsson, Hestamannafélaginu Geysi, sæmd heiðursviðurkenningum frá Íþrótta- og Ólympíusambandi Íslands.

Bæði hafa þau sett sterkan svip á sögu hestaíþrótta á Íslandi, hún í reiðkennslu og æskulýðsstarfi en hann sem keppnisknapi og landsliðseinvaldur. Rosemarie var sæmd heiðurskrossi ÍSÍ, sem er æðsta heiðursviðurkenning íþróttahreyfingarinnar á Íslandi. Viðurkenningin er veitt einstaklingum fyrir frábært, ómetanlegt og langvarandi starf í þágu íþróttahreyfingarinnar. Sigurður var sæmdur gullmerki ÍSÍ. Það er veitt einstaklingum fyrir framúrskarandi störf, sjálfboðaliðastarf eða framlag til íslenskrar íþróttahreyfingar.

Átta einstaklingum var veitt gullmerki LH á þinginu og voru sjö þeirra af sambandsssvæði HSK. Það voru þau Anna Björg Níelsdóttir Hestamannafélaginu Sleipni, Bjarni Þorkelsson Hestamannafélaginu Jökli, Elísabet Sveinsdóttir Hestamannafélaginu Sleipni, Halldór Guðmundsson Hestamannafélaginu Ljúf, Helga Fjóla Guðnadóttir, Hestamannafélaginu Geysi, Helga Ragna Pálsdóttir Hestamannafélaginu Ljúf og Margeir Þorgeirsson, Hestamannafélaginu Geysi. Öll hafa þau unnið ötullega að framgangi hestamennsku og lagt mikið af mörkum hvert á sinn hátt. Þeim voru færðar kærar þakkir fyrir sitt óeigingjarna starf í þágu hestamennskunnar og innilegar hamingjuóskir með heiðursviðurkenninguna.

Á þinginu fóru fram hefðbundin þingstörf og kosning stjórnar fyrir tímabilið 2026–2028. Linda Björk Gunnlaugsdóttir var endurkjörin formaður en hún hefur gegnt embættinu síðustu tvö ár. Sjálfkjörið var bæði í embætti formanns og í stjórn.

Fyrri greinFjárlög 2027 með augum Sunnlendinga