Knattspyrnumaðurinn Rodrigo ‘Roli’ Depetris var útnefndur íþróttamaður Íþróttafélagsins Hamars í Hveragerði árið 2025 á aðalfundi félagsins sem haldinn var á Hótel Örk síðastliðinn miðvikudag.
Roli var lykilmaður í liði Hamars síðasta sumar og fór fyrir liðinu á mögnuðum lokaspretti þar sem Hamar bjargaði sér frá falli úr 4. deildinni. Hann hefur einnig sinnt frábæru starfi sem þjálfari yngri flokka og þeir sem hafa kynnst honum geta vottað um að hann leggur mikla ástríðu í það sem hann tekur sér fyrir hendi, hvort sem það er að miðla reynslu sinni til liðsfélaga og yngri iðkenda eða að hamast í snjómokstri á þungum vetrarmorgnum svo að æfingar dagsins geti farið fram á óupphituðum gervigrasvellinum á grunni Hamarshallarinnar.
Roli var einnig útnefndur knattspyrnumaður ársins hjá Hamri en auk hans voru tilnefnd til íþróttamanns ársins blakmaðurinn Aron Bjarnason, körfuboltamaðurinn Arnar Dagur Daðason, lyftingakonan Anna Guðrún Halldórsdóttir og badmintonkonan Rebekka Einarsdóttir.
Mikilvægi sjálfboðaliðastarfsins var einnig í brennidepli á aðalfundinum en Pétur Frantzon var sæmdur gullmerki Hamars fyrir ómetanlegt framlag sitt til félagsins í gegnum tíðina. Þá fengu þau Sara Hammer og Guðmundur Benóný Baldvinsson sérstaka viðurkenningu sem sjálfboðaliðar Hamars fyrir sín dýrmætu störf.
Ný stjórn var kjörin á aðalfundinum en Þorsteinn T. Ragnarsson er áfram formaður og með honum í stjórn eru þau Dagrún Ösp Össurardóttir, Jónas Guðnason, Eva Harðardóttir og Ágúst Logi Valgeirsson.
