Rjúfa einangrun ungmenna í tölvuleikjum

Stjórn rafíþróttadeildar Dímonar. Ljósmynd/Dímon

Í síðustu viku var rafíþróttadeild Íþróttafélagsins Dímonar formlega stofnuð, á rafrænum stofnfundi.

Markmiðið með stofnun deildarinnar er að rjúfa einangrun ungmenna sem spila mikið af tölvuleikjum og að allir iðkendur fái jákvæða félagslega örvun og kynnist krökkum með sama áhugamál.

“Dæmi eru um börn sem hafa orðið mjög félagslega einangruð í gegnum tölvuleikjanotkun ásamt óæskilegri hegðun bæði í skólanum og heima fyrir. Með stofnun rafíþróttadeildar í sínu sveitarfélagi hafa þessi börn fengið áhugamálið sitt viðurkennt, þau hafa öðlast tækifæri til að hitta börn með sama áhugamál með handleiðslu þjálfara sem kennir þeim rétta umgengni við tölvuiðkunina. Hegðunarmynstur þeirra hefur bæst til muna bæði heima og í skólanum og hafa slíkir einstaklingar einnig sýnt fram á bættann námsárangur,” segir í tilkynningu frá Dímoni.

Fyrsta stjórn deildarinnar var kosin á stofnfundinum en það eru þau Harpa Mjöll Kjartansdóttir, formaður, Magnús Þór Einarsson, ritari, Ellert Geir Ingvason, gjaldkeri og Ágúst Leó Sigurðsson, meðstjórnandi.

Fyrri greinPálmi Gunnarsson er flottastur
Næsta greinHeiðrún og Breki íþróttafólk HSK 2020