Selfoss vann gríðarlega mikilvægan sigur á Stjörnunni á útivelli í botnbaráttu úrvalsdeildar karla í handbolta í dag. Lokatölur í Garðabænum urðu 26-27.
Stjarnan var feti framar nær allan fyrri hálfleikinn, þeir náðu mest fjögurra marka forskoti en Selfoss náði að jafna undir lok fyrri hálfleiks og staðan var 14-13 í leikhléi.
Selfyssingar voru frábærir í upphafi seinni hálfleiks, þeir skoruðu fyrstu sex mörkin og breyttu stöðunni í 14-19. Munurinn hélst í 3-4 mörkum nær allan seinni hálfleikinn. Í lokin hljóp hins vegar mikil spenna í leikinn, Selfoss skoraði ekki mark síðustu sjö mínúturnar en náði að halda út og sigra með eins marks mun.
Tryggvi Sigurberg Traustason var markahæstur Selfyssinga með 7/2 mörk, Sölvi Svavarsson skoraði 6, Hannes Höskuldsson 6/1, Anton Breki Hjaltason 4, Gunnar Kári Bragason 3 og Guðjón Baldur Ómarsson 1.
Alexander Hrafnkelsson varði 12 skot í marki Selfoss og var með 32% markvörslu.
Með sigrinum lyfti Selfoss sér upp í 8. sætið með 11 stig, uppfyrir Stjörnuna sem situr í 10. sæti með 10 stig.