Selfyssingar hófu leik í Grill-66 deild kvenna í handbolta í kvöld þegar þær heimsóttu Fjölni í Grafarvoginn og unnu stórsigur.
Selfoss skoraði fyrstu fjögur mörkin og leiddi 2-11 eftir fimmtán mínútna leik. Það var því strax ljóst í hvað stefndi og staðan var 7-22 í hálfleik.
Selfyssingar tóku fótinn ekki af bensíngjöfinni í seinni hálfleiknum og sigruðu að lokum, 17-44.
Katla María Magnúsdóttir var markahæst Selfyssinga með 16 mörk og Perla Ruth Albertsdóttir skoraði 13. Báðar greinilega í feiknaformi, enda voru þær valdar í A-landsliðið í vikunni fyrir komandi landsleiki gegn Lúxemborg og Færeyjum.
Aðrir markaskorarar Selfoss voru Tinna Sigurrós Traustadóttir, Arna Kristín Einarsdóttir og Hulda Hrönn Bragadóttir allar með 3 mörk, Elínborg Katla Þorbjörnsdóttir skoraði 2 og þær Inga Dís Axelsdóttir, María Guðrún Bergsdóttir, Dagný Huld Birgisdóttir og Adela Eyrún Jóhannsdóttir skoruðu allar 1 mark.
Cornelia Hermansson varði 7 skot í marki Selfoss og Ágústa Tanja Jóhannsdóttir 6.