Rangárþing ytra gerir samstarfssamning við Golfklúbbinn Hellu

Óskar Pálsson, formaður Golfklúbbsins Hellu og Ágúst Sigurðsson, sveitarstjóri Rangárþings ytra við undirritun samstarfssamningsins. Ljósmynd/Aðsend

Golfklúbburinn Hella og Rangárþing ytra hafa undirritað samning til fjögurra ára til eflingar golfíþróttarinnar í héraðinu og til að auðvelda yngri sem eldri íbúum sveitarfélagsins þátttöku í þessari heilsueflandi íþrótt.

Með samningnum eru félaginu tryggðir fjármunir til starfseminnar sem nema 2,8 milljónum króna.

Velflestir golf spilarar þekkja völlinn á Strönd enda er hann einn sá glæsilegasti á öllu landinu. Á Strönd er frábær aðstaða til golfiðkunar þar sem jafnframt fer fram öflugt æskulýðs- og ungmennastarf.

Með samningnum er fyrst og fremst verið að tryggja öflugt starf barna- og unglinga sem og að eldri borgarar geti spilað endurgjaldslaust á vellinum á föstum æfingatímum. Opinn dagur verður haldinn árlega þar sem öllum íbúum Rangárþings ytra býðst að koma á Strönd, kynna sér aðstæður og spila hring á vellinum.

Í dag er það svo að allir mega alltaf koma og spila endurgjaldslaust á pútt æfingavelli, sex holu æfingavelli og á opnu æfingasvæði við vallarhúsið. Hægt er að fá golfbolta á Strönd sem og að leigja kylfur, golfsett og golfbíl fyrir þá sem það kjósa. Á Strönd er einnig frábær veitingastaður.

Að sjálfsögðu voru teknar nokkrar holur á púttvellinum í tilefni þessa áfanga. Ljósmynd/Aðsend