Hrunamenn eiga tvo fulltrúa í fimmtán ára stúlknalandsliði Íslands í körfubolta sem hefur leik á Kaupmannahafnarmótinu í Danmörku í dag.
Þetta eru þær Ragnheiður Björk Einarsdóttir frá Miðfelli 2a og Þórdís Jóna Kristjánsdóttir frá Flúðum. Báðar léku þær í vetur með liði 9. flokks Hrunamanna sem komst meðal annars í bikarúrslit í vetur.
Á Kaupmannahafnarmótið mæta landslið sem og úrvalslið borga eða héraða. Riðlakeppni hefst í dag og klárast á morgun en síðustu úrslitaleikirnir eru svo leiknir á sunnudag.
Ísland hefur titil að verja í keppni U15 ára stúlkna en íslenska liðið vann þetta mót fyrir ári síðan.
Ragnheiður og Þórdís mæta Dönum og Svíum í dag og Finnum í fyrramálið en seinni partinn á morgun verður leikið um sæti.