Ragnheiður Björk íþróttamaður ársins

Íþróttamaður ársins 2015 hjá Ungmennafélagi Hrunmanna var krýndur á aðalfundi félagsins þann 17. apríl síðastliðinn, en það er körfuknattleikskonan Ragnheiður Björk Einarsdóttir.

Ragnheiður lék með Hrunamönnum/Ármanni í 10. flokki en liðið endaði í 3.-4. sæti Íslandsmótsins og einnig með stúlknaflokki félaganna sem endaði í 4. sæti Íslandsmótsins.

Þá lék hún með liði FSu/Hrunamanna í meistaraflokki en liðið endaði í 7. sæti 1. deildar á liðinni leiktíð.

Ragnheiður lék með U16 ára landsliði Íslands sem sigraði örugglega í C-deild Evrópudeildarinnar á Andorra og hafnaði í 5. sæti á Norðurlandamótinu í Solna í Svíþjóð.

Í greinargerð með valinu á Ragnheiði segir að hún sé „íþróttamaður sem hefur náð langt í sinni grein og hefur burði til að ná enn lengra. Hún stundar íþrótt sína vel og er góð fyrirmynd yngri iðkenda. Ragnheiður er góður félagi, áhugasöm og tekur leiðsögn vel.“