U17 ára landslið karla og kvenna í handbolta náðu frábærum árangri á Ólympíuhátíð Evrópuæskunnar í Norður-Makedóníu sem lauk á laugardag.
Tveir leikmenn Umf. Selfoss eru í liðunum á Ólympíuhátíðinni, þau Ragnar Hilmarsson og Eva Lind Tyrfingsdóttir.
Piltaliðið gerði sér lítið fyrir og vann gullverðlaun eftir úrslitaleik á móti Þjóðverjum. Lokatölur urðu 28-25 eftir að jafnt hafði verið í hálfleik 14-14.
Stelpurnar sigruðu Hollendinga 31-26 í leik um 3. sætið eftir frábæra frammistöðu og bronsverðlaunin urðu þeirra. Staðan í hálfleik var 16-15. Eva Lind skoraði 2 mörk í bronsleiknum.
