Ragnar kemur heim

Ragnar kominn í Selfosstreyjuna. Ljósmynd/Selfoss

Örvhenta skyttan Ragnar Jóhannsson hefur samið við handknattleiksdeild Selfoss til þriggja ára. Ragnar þarf vart að kynna, hann er uppalinn á Selfossi og lék 93 leiki með meistaraflokki á árunum 2005 til 2011 og skoraði í þeim 524 mörk.

Ragnar hefur átt góðan feril hér heima og erlendis, en hann gekk til liðs við FH árið 2011. Árið 2015 hélt hann til Þýskalands í atvinnumennsku og hefur verið þar síðan, fyrst með Hüttenberg og svo með Bergischer HC frá árinu 2019. Í Þýskalandi hefur hann skorað 448 mörk í 148 leikjum.

Samningur Ragnars við Bergischer átti að renna út í vor en eftir samkomulag ákvað Ragnar að rifta samningnum nú um áramótin og mun því koma heim á Selfoss í janúar.

Í tilkynningu frá handknattleiksdeild Selfoss segir að með góðum stuðningi dyggra stuðningsaðila var hægt að láta þetta verða að veruleika á þessum, annars erfiðu tímum og er Raggi boðinn hjartanlega velkominn heim.

Hér fyrir neðan er myndband sem Selfyssingar settu saman í tilefni af heimkomu Ragnars.