Ragnar Ágúst Nathanaelsson, körfuknattleiksmaður úr Þór Þorlákshöfn, var valinn íþróttamaður Héraðssambandsins Skarphéðins 2015. Héraðsþing HSK, hið 94., er haldið á Selfossi í dag.
Ragnar lék sem atvinnumaður í Svíþjóð með Sundsvall Dragons á síðustu leiktíð. Hann tók þátt í undankeppni EM með íslenska landsliðinu sem tryggði sér í fyrsta sinn sæti á lokamóti EM. Hann lék einnig með landsliðinu á Smáþjóðaleikunum 2015. Ragnar lék síðan með landsliðinu á lokamóti EM, EuroBasket 2015, sem fram fór í september. Ragnar Ágúst var einn af 12 leikmönnum íslenska liðsins sem skráði sig á spjöld íslenskrar körfuboltasögu og lék með liðinu í Berlín á móti mörgum að bestu körfuknattleiksþjóðum álfunnar.
Ragnar er einn af framtíðarleikmönnum landsliðsins og hefur auk þess leikið mjög vel með Þór Þorlákshöfn, félagsliði sínu, í Domino’s deild karla á þessu keppnistímabili.
Líkt og undanfarin ár kaus fimm manna valnefnd íþróttamann HSK 2015 úr röðum þeirra sem tilnefndir voru af nefndum og ráðum sambandsins. Auk þeirra tilnefnir stjórn sambandsins íþróttamenn í sex greinum, þar sem ekki er starfandi nefnd eða ráð.
Akstursíþróttamaður HSK: Ívar Guðmundsson, Torfæruklúbbi Suðurlands
Badmintonmaður HSK: Axel Örn Sæmundsson, Umf. Þór.
Blakmaður HSK: Ragnheiður Eiríksdóttir, Íþróttafélaginu Hamri
Briddsmaður HSK: Kristján Már Gunnarsson, Umf. Selfoss.
Fimleikamaður HSK: Rikharð Atli Oddsson, Umf. Selfoss.
Frjálsíþróttamaður HSK: Kristinn Þór Kristinsson, Umf. Samhygð.
Golfmaður HSK: Andri Már Óskarsson, Golfklúbbnum Hellu.
Glímumaður HSK: Marín Laufey Davíðsdóttir, Umf. Samhygð.
Handkattleiksmaður HSK: Hrafnhildur Hanna Þrastardóttir, Umf. Selfoss.
Hestaíþróttamaður HSK: Guðmundur Friðrik Björgvinsson, Hestamannafélaginu Geysi.
Íþróttamaður fatlaðra: Guðrún Hulda Sigurjónsdóttir, Íþróttafélaginu Suðra.
Júdómaður HSK: Grímur Ívarsson, Umf. Selfoss.
Knattspyrnumaður HSK: Guðmunda Brynja Óladóttir, Umf. Selfoss.
Körfuknattleiksmaður HSK: Ragnar Ágúst Nathanaelsson, Þór Þorlákshöfn.
Lyftingamaður HSK: Björgvin Karl Guðmundsson, Lyftingafélaginu Hengli.
Mótokrossmaður HSK: Gyða Dögg Heiðarsdóttir, Umf. Selfoss.
Skákmaður HSK: Gunnar Finnlaugsson, Umf. Selfoss.
Skotíþróttamaður HSK: Snorri Jón Valsson, Skotíþróttafélagi Suðurlands.
Sundmaður HSK: Dagbjartur Kristjánsson, Íþróttafélaginu Hamri.
Taekwondomaður HSK: Ingibjörg Erla Grétarsdóttir, Umf. Selfoss.