Ragnar Ágúst íþróttamaður Hveragerðis

Ragnar Ágúst Nathanaelsson, körfuknattleiksmaður var kjörinn íþróttamaður Hveragerðis í athöfn á vegum menningar-, íþrótta- og frístundanefndar í Listasafninu í lok desember.

Ragnar var einn af tólf leikmönnum sem skráði sig á spjöld íslenskrar körfuboltasögu þegar hann lék með A-landsliði karla í Evrópumóti FIBA í Berlín á móti bestu körfuknattleiksþjóðum álfunnar. Ragnar æfði og lék með Sundsvall Dragons í sænsku úrvalsdeildinni fram á vor en nú leikur hann með Þór Þorlákshöfn og er liðið nú 3. sæti í úrvalsdeild.

Það var stór hópur íþróttamanna sem fengu viðurkenningu fyrir frábær afrek á árinu en eftirtaldir fengu viðurkenningu: Björgvin Karl Guðmundsson lyftingamaður, Dagný Lísa Davíðsdóttir körfuknattleikskona, Dagný Rún Gísladóttir knattspyrnukona, Fannar Ingi Steingrímsson golfari, Hafsteinn Valdimarsson blakmaður, Helga Hjartardóttir fimleikakona, Hrund Guðmundsdóttir badmintonkona, Janus Halldór Eiríksson knapi, Kristján Valdimarsson blakmaður, Ragnar Ágúst Nathanaelsson körfuknattleiksmaður, Snorri Þór Árnason akstursíþróttamaður, Úlfar Jón Andrésson íshokkímaður, Þorlákur Máni Dagbjartsson knattspyrnumaður og Þórhallur Einisson badmintonmaður.

Einnig fengu átta íþróttamenn viðurkenningu fyrir að hafa orðið Íslands- eða bikarmeistari á árinu.