Aðalfundur Golfklúbbs Hellu var haldinn í síðustu viku og mættu rúmlega 30 manns á fundinn. Þar bar helst til tíðinda að hjónin Óskar Pálsson og Katrín Björg Aðalbjörnsdóttir gáfu ekki kost á sér til endurkjörs í stjórn, en Óskar hefur verið formaður félagsins í 21 ár og Katrín Björg hefur gengt gjaldkerastöðunni jafn lengi.
Guðmundur Ágúst Ingvarsson var kosinn nýr formaður, en hann hefur verið búsettur í Holtunum undanfarin ár. Hann hefur langa reynslu af stjórnunarstörfum í íþróttahreyfingunni, er nýkjörinn heiðursfélagi ÍSÍ og hefur lengi gengt trúnaðarstöðum innan hreyfingarinnar, er til að mynda fyrrverandi formaður HSÍ og átti um tíma sæti í stjórn ÍSÍ.
Guðrún Arnbjörg Óttarsdóttir var kosin gjaldkeri, en aðrir stjórnarmenn gáfu kost á sér áfram. Einar Long var endurkjörinn varaformaður, Bjarni Jóhannsson ritari og Guðný Rósa Tómasdóttir meðstjórnandi. Varastjórn skipa þeir Guðlaugur Karl Skúlason og Friðrik Sölvi Þórarinsson.
