Hamar vann öruggan sigur á botnliði Snæfells í 1. deild karla í körfubolta í kvöld, 108-79 í Hveragerði.
Leikurinn var jafn í 1. leikhluta en Hamar náði forskoti í 2. leikhluta og leiddi 61-46 í hálfleik. Eftir þessa stórskotahríð í fyrri hálfleik var 3. Leikhluti aðeins rólegri en í síðasta fjórðungnum gerðu Hvergerðingar aftur áhlaup og innsigluðu 29 stiga sigur.
Hamar er í 2. sæti deildarinnar með 34 stig, eins og Höttur sem er í toppsætinu. Snæfell er áfram á botninum með 4 stig.
Ragnar Ragnarsson var stigahæstur í Hamarsliðinu með 24 stig, Pálmi Geir Jónsson skoraði 22 og Björn Ásgeir Ásgeirsson sömuleiðis. Michael Philips skoraði 19 stig og tók 9 fráköst.