Árborg vann öruggan sigur á ÍH í 4. deild karla í knattspyrnu í kvöld. Lokatölur urðu 4-0 og komu öll mörk leiksins á síðustu sautján mínútunum.
Fyrri hálfleikur var tíðindalítill, Árborg stýrði ferðinni og fékk nokkur ágæt færi en annars hélt fimm manna vörn gestanna velli.
Staðan var 0-0 í hálfleik en sóknir Árborgar þyngdust til muna í seinni hálfleik. Ísinn brast loksins á 73. mínútu þegar Jökull Hermannsson skoraði frábært mark og tveimur mínútum síðar tvöfaldaði David Dabrowski forskot Árborgar.
Varamaðurinn Benjamín Óli Ólason lét heldur betur að sér kveða í sínum fyrsta meistaraflokksleik á Íslandsmótinu. Hann kom inná á 78. mínútu og skömmu síðar skoraði hann úr vítaspyrnu sem hann hafði fiskað sjálfur. Benjamín var svo aftur á ferðinni á 90. mínútu þegar hann skoraði sitt annað mark og tryggði Árborg 4-0 sigur.
Árborg er í 3. sæti deildarinnar með 32 stig en ÍH er í 7. sæti með 10 stig.