Selfoss og Þór unnu örugga sigra í 1. deild kvenna í körfubolta í dag. Selfoss tók á móti Njarðvík-b og Þór fékk Skallagrím í heimsókn.
Það tók Selfyssinga dágóða stund að ná tökum á leiknum gegn Njarðvík. Selfoss byrjaði betur en Njarðvíkingar voru frábærir í 2. leikhluta og staðan var 38-44 í hálfleik. Selfossliðið sýndi svo í seinni hálfleiknum í hverju það er gert og landaði góðum sigri, 86-79. Kennedi Watkins var stigahæst Selfyssinga með 27 stig en Mariana Duran framlagshæst með þrefalda tvennu, 22 stig, 13 fráköst og 13 stoðsendingar.
Þór hafði frumkvæðið frá upphafi gegn Skallagrím en það var ekki fyrr en í seinni hálfleiknum sem Þórsarar sýndu sitt rétta andlit. Staðan var 43-31 í hálfleik en Þór keyrði yfir gestina í 3. leikhluta og vann að lokum stórsigur, 89-49. Shawnteanna Tillman var stiga- og framlagshæst Þórsara í dag með 24 stig, 8 fráköst og 8 stoðsendingar og Milica Sirovina var með fínar tölur í sínum fyrsta leik fyrir liðið; 15 stig, 13 fráköst og 7 stolna bolta.
Staðan í deildinni er þannig að sunnlensku liðin eru í tveimur efstu sætunum, Þórsarar í 1. sæti með 12 stig og Selfoss í 2. sæti með 10 stig en Selfoss á leik til góða.
Selfoss-Njardvik b 86-79 (22-14, 16-30, 25-16, 23-19)
Tölfræði Selfoss: Kennedi Watkins 27/6 fráköst, Mariana Duran 22/13 fráköst/13 stoðsendingar, Valdís Una Guðmannsdóttir 11, Perla María Karlsdóttir 10, Eva Rún Dagsdóttir 8/6 fráköst/5 stoðsendingar, Anna Katrín Víðisdóttir 4, Sigríður Svanhvít Magnúsdóttir 2, Heiður Hallgrímsdóttir 2/9 fráköst.
Þór Þ.-Skallagrímur 89-49 (22-10, 21-21, 28-8, 18-10)
Tölfræði Þórs: Shawnteanna Tillman 24/8 fráköst/8 stoðsendingar/6 stolnir, Milica Sirovina 15/13 fráköst/7 stolnir, Thea Ólafía Lucic Jónsdóttir 14/4 fráköst, Jara Björg Gilbertsdóttir 10/5 stolnir, Jóhanna Ýr Ágústsdóttir 9/4 fráköst/8 stoðsendingar/6 stolnir, Sigrún Elfa Ágústsdóttir 7/6 fráköst, Þóra Auðunsdóttir 5, Guðrún Anna Jónsdóttir 3, Dagrún Inga Jónsdóttir 2.