Viðar Örn Kjartansson var allt í öllu í sóknarleik Selfyssinga í dag þegar Fjölnir kom í heimsókn á Selfoss í 1. deild karla í knattspyrnu.
Leiknum lauk með 6-2 sigri Selfyssinga en Viðar Örn skoraði fimm mörk og sendi eina stoðsendingu. Hann er búinn að slá markamet félagsins á einu tímabili, kominn með 29 mörk í deild og bikar í sumar.
Það blés reyndar ekki byrlega fyrir Selfyssinga í upphafi því Fjölnir komst í 0-2 eftir 24 mínútur. Þá tóku Selfyssingar við sér og ógnuðu gestunum hressilega. Viðar Örn skoraði þrennu á ellefu mínútum og staðan var 3-2 í hálfleik.
Selfyssingar voru miklu sprækari aðilinn í seinni hálfleiknum. Viðar Örn bætti fjórða markinu við á 58. mínútu og hann lagði svo upp fimmta markið fyrir Ívan Breka Sigurðsson á 65. mínútu. Viðar var ekki hættur því hann skoraði sitt fimmta mark og sjötta mark Selfyssinga á 74. mínútu. Viðar var tekinn af velli í kjölfarið, eftir það féllu Selfyssingar djúpt á völlinn og leikurinn fjaraði snarlega út.
Selfoss er áfram í 2. sæti deildarinnar, nú með 32 stig en Fjölnir er í 4. sætinu með 25 stig.